Ang pagpangalag naku sa Pikit

Didto ko sa akuang yutang natawhan niadtong Biyernes... Ninghawa mi dire sa Davao alas dos na sa hapon pagkahuman sa akuang programang Iring-iring... Wa man unta koy plano nga muuli apan gihapit jud ko sa akuang maguwang nga si Girlie sa station mao nga nakakuyog na lang ko... Wa man hinuon mi naghuot sa sakyanan mao nga okey ra pud. Ang problema lang kay wa jud koy nabitbit nga purol ug sanina ug brep. Unsaun man lagi kay way plano mubiyahe.

Naabot mi ug Pikit alas siyete na sa gabie. Nagabhian mi kay nihapit pa mi ug Kabacan. Didto lang mi namalit ug mga Christmas Decor para sa balay kay mao may gipangayo ni Mamang. Maayo na lang ni karon kay mga pang dekorasyon na lang ang gipangayo. Sauna tawon kay sosyal kaayo ug gipangayo, PSP jud... Maayo na lang daw kuno kay malingaw siya ug dinuwa. Apan, haskang kamahal man ning PSP oie, mao nga gipalitan na lang siya ug katung tag-500 nga duwa-duwa. Katu bitawng tag isa kalibu ang sulod sa usa ka bala... Mao pud to iyahang gikalingawan.

Anyway, pag-abot namu sa Pikit, nagyawyaw ang mga katiguwangan nga nagpaabot kay nganu kuno nga nagpa-gabie mi nga delikado kaayo ang dalan ilabi sa may Bulit area. Wa man hinuon mi gikulbaan mao nga kabawu mi nga wa juy mahitabong dautan namu. Naa pud mi gisundan nga usa ka kotse so duha ka sakyanan lang jud ang galatagaw sa mangitngit nga dalan. Wa jud mi natagbuan bisan isa ka sakyanan, mao nga tinuod jud diay nga delikado nang mupaso-paso ang mga sakyanan kung dulum na ang dalan. Pag-abot sa Pikit, nakuratan mi kay ang mga tawo sa Palengke kalit nga nagtapok. Wa pud ko kabantay nga katung kotse nga amuang gisundan, nabuthan diay ug ligid. Ingun ana jud ka alerto ang mga taga-pikit. Basta makadungog ug buto, tapok dayun imbes nga manago. Hehehe.

Mingaw man ang selebrasyon sa Undas or kalag-kalag sa Pikit oie. Pagkabuntag, sayu nga nagluto akong mama ug maha blanca, si Golda nga akung pinsan nagluto sab ug macaroni salad ug spaghetti. Namalit lang mi ug biko ug budbod nga maoy among gilamoy padulong minteryo. Pagka-udto, tapok ang mga paryente namu sa balay. Kaun ug paniudto sud-an ang puyo ug gurami nga gi-prito.

Didto na pud naku nakita si Sgt. Sales nga asawa ni Maam Alejandra Sales. Dugay na man diay ning na-stroke si Sgt. Sales ug sa balay diay kini naga-tambay ingun sa akuang mama. Wa na jud ko kaila niya kay guwang na kaayo iya nawong. Hinuon murag biskay na man si Sgt Sales.

Dili jud mamingaw ning amuang balay, kada adlaw duna jud kini tawo. Mingaw na man gani ko didto. Sauna man gud, tong tua pa ko sa Pikit, didto mi magtapok tanan sa balay, and then pagka-gabie manglaag mi ug plaza.. Daghan na sab nga mga ka-batch naku ang wa na pud nagpuyo sa Pikit. Nagbuwag-buwag na jud mi. Duna nay mga bag-ung tubo didto ang uban wa na ko kaila. Mao nga magsige na lang ko ug pangutana kung kinsa to sila.

Alas nuwebe sa buntag na mi nangadtu ug minteryo. Bawal ang sakyanan sa sulod sa minteryo ug kinahanglan lang kini ibilin sa hi-way. Kung medyo alanganin ka mubilin sa sakyanan, dunay usa ka parking area nga dunay bantay apan tig-baynte ang bayad. Okey na lang gihapon. Sa sulod sa minteryo, nangabungkag ang mga pantiyun oie. Luoy kaayo.. Ang mga lubnganan nga marmol, weh bungkag kaayo. Ang mga kinural nga pantiyun, gipang-guba ug gikuha ang mga bakal. Ang ubang lubnganan kay abri na. Dunay mga kalabira nga nanggawas, dunay mga lungon nga naa na sa gawas. Ang mga datu sa pikit nga didto gipanglubong, bungkag sab.

Kinsa man kaha ang mga suspek aning pagpamungkag sa mga lubnganan. Di pud ko katudlo kung kinsa kay wa man pud tay igung ebidensya. Hahay, subo kaayo intawon tan-awon ang minteryo sa Pikit karon. Hinaut nga hatagan sab kini ug igung pagtagad sa lokal nga pang-gamhanan.

Wa pud mi nagdugay sa minteryo oie. Nanguli mi dayun. Wa na pud mi ganahi ug kaun sa minteryo kay gipangluod sa mga kalansay nga nagkatag. Maong sa balay na lang mi nag-sima-sima.

Alas kwatro sa hapon na ming ningbiya sa Pikit. But before ko niuli namalit sa ko ug tinagtag - pagkaun sa muslim, nga maoy akong gipasalubong sa akuang mga kaubanan dire sa davao. Dili jud pud naku makalimtan ang pagkaun ug tinagtag. Mao gud ni ang usa naku ka paboritong sima-simaun kung muadto ko ug palengke sauna aside from PATIL of course.. hehehe

Ikaw, hows ur all souls and all saints celebration?