Kini ang akung Suliran....

Welcome sa atuang sugilanon... KINI ANG AKUNG SULIRAN... Mga suliran nga angay natung hatagan ug solusyon. Busa iandam na ang inyong mga balde, tuwalya ug labakara ug atung paminawon ang suwat pinadala ni Hermit da Kermit aka Propesor Hermit.

Mao kini ang atung suwat tampo karung adlawa...

Dear KOYA;

Usa ka malinawon ug mabungahong bag-ung tuig kanatung tanan. Ania ko karun arun akong isaysay kaninyong tanan ning akong suliran nga dugay na nakung gikuptan. Sa pagkatinuod lang, di unta naku ni angay nga iyagyag sa kahanginan apan dili na jud naku mapugngan ang kasakit sa akuang dughan.

Koya, nagsugod ang akuang suliran sa dihang akong nabatian pinaagi sa radyo ang programang Iring-iring. Koya, na-engganyo jud ko sa dihang akong nabatian ang mga iring nga nag-payts mumu sa kahanginan. Sa tinuod lang, apil pud nga ning-kibut ang akuang lubot sa dihang nadunggan sab naku ang ngan sa usa ka baye nga maoy nagpa-ulbo sa akung nagdilaab na daan nga dughan.

Sa unang pagkadungog ko pa lamang sa iyahang ngan, i know na jud nga siya na ang babayeng maoy giingun sa mananagna nga akuang natagbuan didto sa kalasangan sa Carcar Cebu. Koya, siya na jud ang maoy gikatakna sa akong kapalaran..

Siya gihinganlan ug Ira... Donna Ira aka Dora dora d explorer to be eksak...

Kabawu ko deep in my heart KOYA nga bisan pa man ug daghan nang babaye nga nagagukod ug nangagi sa akuang mga kamot ug bukton, si Ira na jud ang mamahimong inahan sa akuang duha ka dosenang anak nga puro lalake ug maoy makapanglaba sa akuang mga hinubuan, maoy muluto kung ako gigutom ug mumasahe kung ang akong lawas nanakit.

Si Ira na jud ang babayeng angay nakung ulian ug siya na ang babayeng akong pakaslan ibabaw sa bungtod sa Matina Pangi.

Pero kadtung mga panahuna nga nadunggan naku ang ngan ni Ira, duna pa koy babaye nga akuang ginakambras KOYA.. Matag tugnaw nga gabie, didto mi sa iyahang Car naga-kambras kambras. In pak, kung mananghid man gani ko sa akuang very estrekta nga mama, ingnun lang naku nga muadtu ko sa Lab Radyow, pero sa tinuod diay didto ko sa akuang uyab nagsige ug kiat-kiat..

Pero I am happy to say nga nagbuwag ra gyud tawun mi kay wa mi nagkasinabtanay. Ang iyang gusto kay magdrive drive lang ug magsuroy suroy sa dakbayan pero lahi man sab ang akuang gusto kay siya man ang akuang drayban.. Ahihihi...

Mao to nga bisan kun sakit man, wa na koy mahimo pa kay desisyon na man to niya. Pero daku nakung kalipay tungod kay si Ira Dora dora ra jud ang nakatabang kanaku aron makalimtan naku ang akuang "EX"...

Wa na naku jud gidugay pa... Wa na naku gilangan-langan pa ang panahon ug ako gyud nga gipakigkita si Ira. Sus, ginoo kong gagmay, haskang gwapaha man diay ni niya... Mura gyud ko ug ice cream nga natunaw sa dihang nakita naku ang kaanyag ni Ira niadtung higayuna. Nagdesisyon gyud ko KOYA nga di na naku ni buy-an pa si Ira.

Mao to, mga pila na ka semana ang nilabay apan wa pa pud nakadesisyon si Ira kung iya ba kong sugton o di.. Unsaun man nga gikan ra pud sa kasakit ning si Ira Koya. Bag-u lang man pud gud sila nagbuwag sa iyahang hinigugma nga si TUSOK. Dah, kung akong ikumpara ang akuang sarili kang TUSOK mas gwapu pa ko niya oie. Propesor na gud ko KOYA pero si Tusok, estudyante pa lang. Diba mas lamang na kaayo ko? And besayds, "I WILL TAKE CARE OF IRA"...

Hahay, magpaabot pa intawon ko ani KOYA kung kanus-a gyud ko sugton ni Ira kay ingun niya karung 2009 man kuno niya ihatag kanaku ang iyahang matam-is nga "OO"... Eksayted na kaayo ko KOYA kung sugton ko ni Ira. Daghan na gako ko plano para sa amuang duha.

Sus abi nimu KOYA, kung sugton man galing ko ni IRa, ako nay magpalawug sa iyahang itoy nga si Chu-chai, ako na pud ang mamisbis sa ilahang mga buwak, ako ang manglimpisa sa ilahang bukid ug labaw sa tanan ako na ang magpakaun sa ilahang mga manok.

Ingun ana ang akong gugma kang IRA koya... Di na gyud ni mabangbang...

Ikaw kOya, unsa kaha sa tan-aw nimu.. Sugton ba ko ni Ira o dili? Lamdagi ning akong panghuna-huna Koya beh pleaseeee....

Hala, nakalimot ko, taas na man diay ning akong suwat... Na hala KOYA, dire na lang ko taman. Kabawu ko nga kapoi na ka diha ug basa-basa ug tuplok tuplok sa imuhang pyuter.

Hangtud sa sunod nga higayun na pud... Daghan kaayong salamat ug malipayong bag-ung tuig kanatung tanan..

Ako ang iyong ubos nga higala,

HERMIT da KERMIT