Mga panghitabo karong panahuna

After sa pag-agi sa bagyong Frank dire sa Pilipinas, daghang pinoy ang naapektuhan. Lakip na dinhi ang pagka-unlod sa barkong M/V Princess of the stars, usa sa pinakadakung barko dire sa Pilipinas diha sa kadagatan sa Romblon niadtong Biyernes sa gabie. Gatusan ang namatay niadto.

Kung magtan-aw gani ko ug balita sa TV, manlumo jud ko nga makita ang mga pamilya sa mga biktima. Duna sab mga bangka nga nanga-anud. Mga mangingisda nga ningkaun na lang ug styrofoam arun lang mabuhi samtang naglutaw-lutaw sila sa kadagatan. Dunay mga panimalay nga nanga-anud ug kaluoy lang pud sa mga pamilyang apektado niini.

Kung atuang tan-awon, ang Pilipinas always na jud nga gina-agian ug bagyo. Samtang nagkadugay, nagkadaku ug nagkadaghan na ang apektado niini. Ingun pa gani sa ubang grupo sa relihiyon nga kini usa ka timailhan nga magunaw na daw ang kalibutan.

Ang sobrang epekto sa mga bagyo nga nangagi dire sa nasud resulta kuno sa sobrang pagkadaut na pud sa atuang kinaiyahan. Ilabi na nga ang mga kabukiran karun nanga-upaw kay tungod sa mga "developments" nga kuno maoy makahatag ug ayuda sa kalisud sa katawhan.

Apan kung atuang tan-awon, ilabi na dire sa davao, hinay nga pag-ulan lang gani, unlod na ang siyudad. Tungod kay wa na may mga kakahuyan nga maoy makatabang arun mapugngan ang pagbaha. Ang uban nagpasalamat pa kay tungod ang Davao kuno dili jud madutlan ug bagyo kay tungod gipalibutan ta dire ug mga dagkung bukid sama sa bukid apo nga maoy pinakataas nga bukid dire sa nasud. Apan, apektado lang gihapon ta kay bisan pa man gani ug gamayng ulan lang ang mitagak dire sa atuang siyudad magbaha man dayun. Duna pa man gani mga lugar dire nga maglunop jud, diin ang baha lapas atup na.

Na-remember naku hinuon tong panahon nga nagpuyo pa mi diha sa may NHA Bangkal. Ang tubig, hilabihang taasa. Grabe ang kakusog sa tubig nga nag-agus gikan sa kabukiran. Ang Jade Valley, usa sa pinaka-ubos nga lugar dire sa DAvao, haskang bahaa sab diha sa ilahang lugar. Naunsa na man ni?

After what happened last week dire sa Davao, nagpaguwa ug mandu si Mayor Rody Duterte sa iyahang mga opisyales nga kinahanglan sulbarun ang problema sa pagbaha dire sa siyudad sa sulod sa kinse (15) ka diyas lamang. Mao nga kung maglakaw ka karun, misag asa nga lugar, duna kay makit-an nga mga empleyado sa DPWH nga nagahigup niining mga basura nga maoy hinungdan sa pagbara sa mga kanal.

Mao nga naguol na lamang intawon ko nga magsud-ong sa ilaha. Ingun ani jud diay ang pinoy noh? Dili mangita ug pamaagi hangtud nga wa pa kini nasinatian nga maoy labawng makahatag ug kalisud kanatu. PINOY JUD!

Aww, kung di man gud ta manglihok karun kita ra man gihapon ang maapektuhan. Busa lihok sab intawon katawhang Pilipino.